УКМК: Депутат Бакировдун уюшкан кылмыштуу топтун лидери менен байланышы аныкталды (видео)
УКМК Жогорку Кеңештин депутаты Өмүрбек Бакиров уюшкан кылмыштуу топтун лидери менен жолугушканын аныктады. Атайын кызматтан бул боюнча далилдүү фактылар бар экенин кабарлашат.
"Крим төбөл Камчы Асанбек менен Жогорку Кеңештин депутаты Өмүрбек Бакировдун ортосундагы байланышка өзгөчө көңүл бурууга татыктуу. Өмүрбек Бакиров 25-декабрда Чолпон-Ата шаарына уюшкан кылмыштуу топтун лидери менен "Барс" спорттук-эс алуу комплексинде жашыруун жолугушуу үчүн атайын барганы аныкталды. Бул боюнча далилдүү фактылар бар", - дешет мекемеден.
УКМК тарабынан уюшкан кылмыштуулук менен күрөшүү жана аны мамлекеттик бийликтин бардык деңгээлдериндеги кызмат адамдары менен биригүүсү боюнча тынымсыз чаралар көрүлүп жатканын белгилешти.
"Кылмышкерлер менен мындай байланыштар бир гана чиновниктер эмес, өзгөчө эл өкүлдөрү, бийликти дискредитациялоого, элдин ишенимине доо кетирүүгө жана өлкөнүн жогорку жетекчилигинин экономиканы өнүктүрүүгө жана мамлекеттүүлүктү чыңдоого багытталган аракеттерин нейтралдаштыруу болуп саналат.
Ушуга байланыштуу УКМК кызматкерлерге, анын ичинде депутаттарга кылмыштуу элементтер менен байланышууга жол берилбестигин эскертет. Бул алардын кылмыштуу аракеттерине шериктештик катары бааланат", - деп эскертишет комитеттен.
