КМШ мамлекет башчыларынын кеңешинин кезектеги жыйыны Бишкекте өтөт. Дагы эмне белгилүү

Бүгүн, 14-октябрда Астанада өтүп жаткан Көз карандысыз мамлекеттер шериктештигинин мамлекет башчыларынын кеңешинин жыйынында бир катар маанилүү документтерге кол коюлду. Алардын баары соода-экономикалык, маданий-гуманитардык жана коопсуздук тармагындагы интеграциялык байланыштарды мындан ары өнүктүрүүгө жана бекемдөөгө багытталган. Бул тууралуу президенттик аппараттын маалыматтык саясат кызматы билдирди.

Төмөнкү документтерге кол коюлуп, бекитилди:

• КМШ мамлекет башчыларынын кеңешинин кезектеги жыйынын 2023-жылы Бишкек шаарында өткөрүү жөнүндө;
• Аткаруу комитетинин төрагасы - КМШ аткаруу катчысы жөнүндө;
• КМШны өнүктүрүүдө ага мүчө-мамлекеттердин Парламенттер аралык ассамблеясынын ролу жөнүндө;
• КМШнын алдында түзүлгөн орус тилин колдоо жана өнүктүрүү боюнча эл аралык уюм жөнүндө;
• КМШда 2024-жылды Ыктыярчылар кыймылынын жылы, 2025-жылды Улуу Ата Мекендик согуштагы Жеңиштин 80 жылдыгы - нацизмге каршы күрөшүүдөгү тынчтык жана биримдик жылы, 2026-жылды Саламаттык сактоо жылы деп жарыялоо тууралуу;
• КМШга мүчө-мамлекеттердин шайлоо органдарынын жетекчилеринин консультативдик кеңешин түзүү тууралуу макулдашуу жөнүндө;
• КМШга мүчө мамлекеттердин коррупцияга каршы күрөшүү боюнча кызматташуусу тууралуу макулдашуу жөнүндө;
• КМШга мүчө-мамлекеттердин 2023-2025-жылдарга карата терроризмге жана экстремизмге каршы күрөшүү боюнча кызматташуу программасы жөнүндө;
• Эркин соода кызмат көрсөтүү, инвестиция түзүү, анын ишмердиги жана аны ишке ашыруу тууралуу макулдашуунун долбоорун даярдоо жөнүндө;
• 2024-жылы Санкт-Петербург шаарын Шериктештиктин маданий борбору деп жарыялоо жөнүндө;
• КМШга Жамааттык коопсуздук келишим уюмуна байкоочу макамын берүү жөнүндө;
• КМШнын Адам укуктары боюнча комиссиясы жөнүндө;
• КМШнын Ардак грамотасы менен сыйлоо жөнүндө;
• КМШга мүчө-мамлекеттердин президенттеринин маданият чөйрөсүндө кызматташтыкты өнүктүрүү тууралуу билдирүүсү жөнүндө;
• КМШга мүчө-мамлекеттердин президенттеринин климат чөйрөсүндө кызматташуу тууралуу билдирүүсү жөнүндө.