Акылбек Жапаров Баткендеги талкаланган үйлөрдү калыбына келтирүү боюнча иштерди текшерди
Бүгүн, 30-сентябрда Акылбек Жапаров Баткен облусунун Баткен районунун Капчыгай, Ак-Сай, Миң-Өрүк жана Достук айылдарына барды. Бул жерде ал талкаланган үйлөрдү жана инфраструктураны калыбына келтирүү боюнча иштердин жүрүшүн текшерди. Бул тууралуу КР министрлер кабинетинин басма сөз кызматы билдирди.
Өкмөт башчы чек арага жакын жайгашкан айылдардын тургундары менен жолугушуп, жабыркаган турак жайларды, социалдык жана инфраструктуралык объектилерди көрүп чыкты.
Учурда жеринде объекттерди баалоо жана калыбына келтирүү иштери жүрүп жатат. Калыбына келтирүү иштерине куткаруучулар, волонтерлор, атайын техникалар тартылган.
"Капчыгай айылында дээрлик үйлөрдүн баары талкаланган. Тиешелүү инфраструктура менен камсыздалган жаңы үйлөрдү курабыз, анын ичинде таза суу, көчөлөрдү жарыктандыруу, жолдорду асфальттоо бар. Бул жаңы айыл болот, тиешелүү башкы план түзүлүшү керек", - деди Акылбек Жапаров тиешелүү мамлекеттик жана жергиликтүү бийлик органдарына тапшырмаларды берип.
Ак-Сай айылында министрлер кабинетинин төрагасы талкаланган мектептин имараты менен таанышып, жаңы мектеп курууну тапшырды.
Ал мамлекеттик каржы институттары өндүрүштү калыбына келтирүүгө жана өнүктүрүүгө жеңилдетилген насыяларды бөлөрүн белгиледи.
Баткенде Акылбек Жапаров чогулгандар менен биргеликте куралдуу кагылыштан каза болгондордун элесине таазим кылды.
