Көрүшкөнүнө сүйүнүп... Депутаттар эс алуудан кайтып келди (сүрөттөр)
Бүгүн, 1-сентябрда Жогорку Кеңештин депутаттары эс алуудан кайтып келип, экинчи сессиясынын ачылышы өттү. Депутаттар жолугуп жылуу учурашып, көрүшкөнүнө сүйүнүп, алтургай жыйындар залында ызы-чуу жаралды. Жайкы каникулдан кийинки мектептеги биринчи күн сыяктуу.
Жогорку Кеңештин төрагасы Талант Мамытов сессияны ачык деп жарыялап, Кыргыз Республикасынын мамлекеттик гимни жаңырды. Ал эми Акылбек Жапаров өзүнүн жана президент Садыр Жапаровдун атынан жаңы сессиянын башталышы менен куттуктап, аларга ийгилик каалады.
Айтмакчы, жыйындар залы оңдолуп, көптөн бери илинип турган сахна артындагы кездеме алынган. Мындан тышкары коридорлорго жаңы килемдер төшөлгөн.
Талант Мамытов депутаттардын иши комитеттерде улана турганын белгилеп, жыйынды жабык деп жарыялайын дегенде Тазабек Икрамов менен Шайлообек Атазов депутаттар эки айдан бери шайлоочулар менен жолугуп келгенин, андыктан жарандар айткан көйгөйлөрдү кароо керектигин айтышты.
Талкуунун жыйынтыгында Жогорку Кеңеш өкмөттү кызыктырган суроолорду берүү үчүн өкмөттүк күн өткөрүү чечимине келди.
