Ысык-Көлдө казакстандык жеңил атлетчини өлтүрө сүзгөн айдоочу 2 айга камалды
Ысык-Көл облусунун Комсомол айылында Lexus RX 330 унаасынын айдоочусу Казакстандын жеңил атлетика боюнча машыктыруучусу Мурат Жузгенбаевди сүзүп кеткен. Кырсыктан коңшу өлкөнүн жараны каза болгон.
Ысык-Көл облустук сотунун маалымат кызматынан Kaktus.kg`ге билдиргендей, айдоочунун бөгөт чарасы тандалды.
Ысык-Көл райондук соту адам өлүмүнө шектелген айдоочунун бөгөт чарасын 17-июлда карады. Ага ылайык, шектүү делинген айдоочу 2 айга, тагыраагы, 17-сентябрга чейин камакка алынды.
Белгилей кетсек, 16-июлда Комсомол айылына жакын жерде жол тандабастын айдоочусу казакстандык спортчуну өлтүрө сүзгөндүгү маалымдалган. Кийинчерээк маркум СССРдин спорт чебери, жогорку квалификациялык деңгээлдеги машыктыруучу экени белгилүү болгон. Ал 3-июлдан 20-июлга чейин Чолпон-Атага машыгуу сборуна жөнөтүлгөн.
