"Арак ичүүгө мажбурлаган". 6 жашар кызды кордоо боюнча иш токтотулду
Адвокат Мухайе Абдураупова социалдык тармактагы баракчасына балдарга карата жасалган зомбулук тууралуу дагы бир окуяны жазды. Билдирүүдө, Ош облусунун Араван айылында 6 жаштагы кыздын атасы баланы кордогон деп шектелген. Бирок иш токтотулган.
Анын айтымында, иш апрель айында жабылган. Бирок бул тууралуу кыздын апасы Абдурауповадан бир нече күн мурун билген. "Дагы эле эч ким чалган же кошумча тергөө амалдарын жүргүзгөн эмес, соттук-медициналык-психологиялык жана психиатриялык экспертиза дайындаган эмес, түшүнүксүз тактар бар кийимдерди талап кылган эмес", - деп нааразы болду адвокат.
Мухайе Абдураупова бул окуя тууралуу ушул жылдын март айында Facebook баракчасына билдирген. Анын айтымында, 6 жаштагы кызды өз атасы кордогон. Бала окуяны толук айтып бере алган эмес, анткени айрым терминдерди түшүнбөйт жана билбейт.
"Милиция эгер кыз айта албаса, анда зордук-зомбулук болгон эмес деп эсептейт. Ошол эле учурда алар медициналык, психологиялык, психиатриялык, биологиялык экспертизаларды дайындабайт. Эмне үчүн мындай болуп жатат? Эмне үчүн милиция мындай оор кылмыштарга кайдыгер карайт? Бала чоң киши ага эмне кылганын айтып бере албаса эле, бардык педофилдерди актай берсе болобу?" - деди адвокат.
Анын айтымында, атасы башка нерселер менен катар кызын арак ичүүгө мажбурлаган. "Ал кызын алып, бир бөлмөгө камап алып, аны менен жатарын айтат. Атып салам деп коркуткан, милиция анын куралын тартып алган", - деди Абдураупова.
