Президенттин басма сөз катчысы депутаттарга эскертүү менен кайрылды
Мамлекет башчынын басма сөз катчысы Эрбол Султанбаев Жогорку Кеңештин депутаттарынын Казакстан жана сугат суу боюнча айткандарына комментарий берди.
Султанбаев депутаттарды коңшу мамлекеттердин дарегине сын айтууда жана эл аралык мамилелерге байланыштуу маселелерде этият болууга чакырды.
"Депутат дагы саясий адам. Ар бир айткан сөзүңүздөр эл аралык аренада эске алынат, анын артынан реакция болушу да мүмкүн. Жаратканга шүгүр, биз бүгүн баардык мамлекеттер менен, анын ичинде коңшулар менен да жакшы мамиледебиз", - деди ал.
Албетте, айрым учурлар бар, бирок жалпысынан караганда жаман эмес. Биз бардык маселелерди өз ара кызыкчылыктарды эске алуу менен сүйлөшүү жолу менен чечебиз.
Эске салсак, депутат Марлен Маматалиев эки мамлекеттин чек арасында жүк ташуучу унааларды текшерүүдөн өтүп жаткандыктан Казакстанга сууну өчүрүү зарылдыгын, бул ЕАЭБ алкагында түзүлгөн келишимге байланыштуу болбошу керектигин айткан. Буга чейин Айбек Алтынбеков да ушундай демилге менен чыккан эле. Кийинчерээк Казакстандын каржы министри Ерулан Жамаубаев Казакстанда кыргыз өкмөтү менен эч кандай түшүнбөстүктөр болбогонун билдирди.
