Алмазбек Атамбаевге тез жардам чакыртылды
Алмазбек Атамбаевге сот залына тез жардам чакырышкан. Экс-президентке эмне болгону азырынча ачыктала элек.
Бүгүн, 4-апрелде Бишкектин Биринчи Май райондук сотунда 2020-жылдагы Октябрь окуясы боюнча соттук отурум уланууда. Мурдагы мамлекет башчы Алмазбек Атамбаев, Фарид Ниязов, Канат Сагымбаев, Темирлан Султанбеков, Жеңиш Молдокматов жана башка бир катар адамдарга Кылмыш-жаза кодексинин бир нече беренелери боюнча кылмыш иши козголгон.
Атамбаев журналисттерге сотко мажбурлап алып келишкенден кийин ден соолугу начарлап кеткенин айтты.
"23-марттан кийинки абалым анча деле жакшы эмес, өзүңөр түшүнөсүңөр. Мен тиземди көрсөтмөкмүн, бирок ыңгайсыз. Алар мени абакта текшергиси келгени олуттуу иш эмес. Бул, балким, менин өлүмүмдү кечеңдетүү үчүн жасалса керек. Менин алдымда милдеттерим бар, өлбөшүм керек", - деди ал.
Алмазбек Атамбаевдин жубайы Раиса күйөөсүнүн абалын көрүү үчүн конвойдун бөлмөсүнө кирүүгө аракет кылган, бирок аны киргизбей коюшкан.
"Сот залында тыгын болуп, аба жетишпей калды. Ал эми Фарид Ниязов экөө камерада болуп бизден жаман болду. Ошондон улам абалы начарлап кетти", - деди Раиса.
