Кыргызстандын ТИМи Зеленскийдин элчини чакыртып алышы боюнча комментарий берди
1-март күнү Владимир Зеленский Кыргызстан менен Грузиядагы элчилерин чакыртып алганын жар салган.
Кыргызстандын Тышкы иштер министрлигинин маалымат департаментинин директору Нурлан Сүйөркулов Украинанын Кыргызстандагы элчисин чакыртып алганына комментарий берди.
Белгилей кетсек, 1-март күнү Владимир Зеленский Кыргызстан менен Грузиядагы элчилерин чакыртып алганын жар салган.
"Элчини чакыртып алуу - бул ар бир мамлекеттин суверендүү укугу. Украинанын эли менен өлкө жетекчилиги оор күндөрдү баштан кечирүүдө. Өтө оор чечимдер кабыл алынып жаткан кез. Ошондуктан мындай абалда талаш-тартышка түшпөйбүз, орунсуз да болуп калат", - деди ТИМдин маалымат департаментинин жетекчиси Нурлан Сүйөркулов.
Ал ошондой эле Украина элине ачык асман каалап, эки тараптуу кызматташууга даяр экенин кошумчалаган.
Маалымат талаасында Кыргызстандын Украинадагы абал боюнча позициясы бурмаланып кетпеши үчүн ал КРдин расмий билдирүүсүн эске сала кеткен.
Департамент жетекчисинин кебин тезис менен беребиз:
Биринчиден, азыркы конфликтиге эки бир тууган элдин тартылып калганы жана окуялар адам өлүмү менен коштолгону абдан өкүнүчтүү. Экинчиден, Кыргызстандын орус эли менен дагы, украин эли менен дагы тарыхый достук мамилеси бар. Үчүнчүдөн, тилекке каршы, бүгүнкү күндө дүйнө бириккендин ордуна бөлүнүп жатканын көрүп жатабыз. Конфликт улам курчуп жаткан кезде тынчтык үчүн чакырыктарды баарынан уга алган жокпуз. Өтө кооптуу учурда жалпы тынчтык үчүн бардык тараптарды биригүүгө чакырабыз. Төртүнчүдөн, биз конфликтинин эл аралык укуктун нормалары менен жалпы принциптердин алкагында саясий-дипломатиялык жол менен чечилишин жактайбыз.
Биз эки тараптуу сүйлөшүүлөрдүн башталышын колдойбуз. Эгер тынчтыкты камсыздоо боюнча айрым механизмдер иштебей калса, биз биргеликте эффективдүү диалогдун арты менен жаңысын табышыбыз керек. Бул сүйлөшүүлөрдүн ийгиликтүү өтүшүнө бардыгыбыз кол кабыш кылууга тийишпиз. Мындан ары да адамдардын курман болушуна, кыйроолорго, конфликтиге жаңы мамлекеттердин кошулушуна жол бербөө зарыл.
Булак: Sputnik Кыргызстан
