Адахан Мадумаров өзүнө козголгон кылмыш иши боюнча комментарий берди
"Башкы прокурордун абийиринде болсун, анткени мындай убакыт тез өтөт. Эртең башкы прокурор өзү жок болгонун, чечимди анын орун басарлары кабыл алганын айтат", - деди Адахан Мадумаров Жогорку Кеңештин жыйынында.
Белгилей кетсек, Жогорку Кеңештин айрым депутаттары Адахан Мадумаровду кылмыш жоопкерчилигине тартуу идеясын жеке өзү окуп берүү үчүн парламенттин жыйынына башкы прокурор Курманкул Зулушевдин катышуусун талап кылышкан. Ошондой эле депутаттар тобу Зулушев парламентке келмейинче Мадумаровдун ишин карай турган депутаттык комиссия түзбөөнү сунушташты.
Мадумаров белгилегендей, жакында бир депутат Россияда кокусунан багыш атып алган, аны жоопко тартуу үчүн Башкы прокурор өзү Мамлекеттик Думага келген.
"Анткени бул мамлекеттик Думанын деңгээли, эрежелери ушундай. Мен дагы эле комиссия түзүүнү сунуштайм, эгерде регламенттин талаптары ушундай болсо, түзүш керек", - деди Мадумаров.
Ал мындай жагдайга "Бүтүн Кыргызстан" партиясынын мүчөлөрү жана депутаттары гана туш болуп жаткандыктан, муну саясий куугунтук деп эсептейт.
"Комиссия карап көрсүн, мен ишенем, тез арада акыйкат чечим чыгарат. Калганын башкы прокурордун абийирине коёлу", - деп жыйынтыктады ал.
Эске салсак, Мадумаров мамлекеттик чек аранын кыргыз-тажик тилкесиндеги жерлерди сатуу боюнча бир нече жолу күбө катары суракка алынган. Буга чейин 2021-жылдын ноябрында президент Садыр Жапаров Баткен облусундагы жерлерди сатуу боюнча иликтөө башталарын билдирген. 10-февралда Башкы прокурор парламентке депутат Адахан Мадумаровду кылмыш жоопкерчилигине тартуу сунушун киргизгени белгилүү болду.
