Эки жашар баланын зөөкүрлүк менен сабалышы. Чиновниктер ага барышты
Балдар укугу боюнча ыйгарым укуктуу өкүл Жыпариса Рысбекова бүгүн, 5-февралда зордук-зомбулукка кабылып, Сокулуктагы жалпы медициналык практика борборуна жаткырылган наристеден кабар алды. Бул тууралуу президенттик администрациядан кабарлашты.
Билдирүүгө ылайык, аталган борборго Чүй облусунун губарнаторунун орун басары Светлана Волкова, Сокулук районунун акими Курбанбек Айтибаев, Сокулук райондук эмгек жана социалдык өнүгүү башкармалыгынын жана Сокулук райондук ички иштер бөлүмүнүн кызматкерлери катышкан.
Жолугушууда Жыпариса Рысбекова баланын ден соолугунун абалы менен таанышып, дарылоочу дарыгер менен баарлашып, баланын атасынын пикирин угуп, ал жагдай боюнча айтып берди.
Бул факты Сокулук районунун ички иштер башкармалыгына катталып, тергөө амалдары жүрүп жатат.
"Бардык тиешелүү кызматтарга Кыргыз Республикасынын Балдар укугу боюнча ыйгарым укуктуу өкүлү жөнүндө жободо каралган ыйгарым укуктарга ылайык, Жыпариса Рысбекованын ыйгарым укуктарынын чегинде тапшырмалар берилди. Тактап айтканда, үй-бүлөнү социалдык жактан колдоого алуу боюнча иштерди тез арада уюштуруу тапшырылды", - деп жазылат билдирүүдө.
Наристеге президенттин ыйгарым укуктуу өкүлү жана Сокулук райондук мамлекеттик администрациясы тарабынан бардык керектүү жардамдар көрсөтүлөт.
Ошол эле учурда бул маселе балдар иштери боюнча комиссияда каралат.
Эске салсак, 3-февраль күнү саат 21:30дар чамасында аймактык ооруканага денесинен ар кандай жаракат алган эки жашар бөбөк түшкөн. Аталган факт Сокулук РИИБи тарабынан Кылмыш-жаза кодексинин 138-беренеси ("Кыйноо") боюнча Бирдиктүү реестрге катталып, тиешелүү экспертиза дайындалган. Кийинчерээк милиция аталган кылмышка шектүү катары Сокулук районунун 35 жаштагы тургунун кармап, убактылуу кармоочу жайга киргизген. Алдын ала маалыматтар боюнча, баланын ата-энеси жергиликтүү тургундун малын карап иштечү. Буга чейин мал караган жубайлар жумуш берген адамга карыз болуп калышкан. Аялдын көрсөтмөсүнө ылайык, уулун аны менен чогуу жашаган киши сабаган. Тагыраагы, бул жубайларга жумуш берген жергиликтүү тургун. Учурда иликтөө иштери уланууда.
ЮНИСЕФтин маалыматы ылайык, Кыргызстанда балдардын 73% үй-бүлөдөгү ташбоор мамиледен жапа чексе, 83,5% мектептеги зомбулуктун курмандыгы болот.
