Улукбек Кочкоров: Тажикстан чек ара маселесин чечүүгө кызыкдар эмес
Жогорку Кеңештин экс-депутаты Улукбек Кочкоров "Азаттык" радиосунун түз эфиринде Тажикстан менен чек арадагы кырдаал боюнча пикирин билдирди.
Ал Кыргызстанда бийлик бат-баттан алмашып жатышы Кыргызстандын чек ара маселеси боюнча стратегия түзүүгө мүмкүндүк бербей жатат деп эсептейт.
"Тажикстанда 30 жылдан ашык убакыттан бери стабилдүү өкмөт бар. Ал эми биздин өкмөт беш жылда бир алмашып турат, жада калса акыркы бир жылда эки жолу алмашты. Мунун баары кырдаалга таасирин тийгизүүдө. Алар (Тажикстан) стратегиялык план түзүп, ошого жараша иш алып барып, конкреттүү пункттар менен иш-чараларга барышат. Биздин өлкөдө ар бир жаңы премьер-министр күнүмдүк иштер менен алек болуп, бул кырдаалга стратегиялык көз карашы жок", - дейт Кочкоров.
Ал чек арадагы чыр-чатактар атайын провокация болуп жатат деп эсептейт.
Тажикстан менен чыр-чатактар суудан, жолдон башталат деп жатабыз. Жок, мунун артында так план менен иш алып барган өзүнчө күчтөр турат. Менимче, азыр болуп жаткан нерсе пландын бир бөлүгү гана.
"Мисалы, өткөн жылдын апрель окуясында ушундай болгон. Ал эми жакында болгон чыр чатакта эки жигит гана мушташып кеткенине карабай, миномет, гранатометтон атуу болду? Буга эмне негиз бар эле", - деди саясатчы.
Анын пикиринде, тажик тарап чек ара маселелерин чечүүгө кызыкдар эмес жана чек арадагы үзгүлтүксүз чыр-чатактар Кыргызстанды өзүнө ыңгайлуу шарттарга түртүп жатат.
Коңшуларыбызга чек ара маселесин чечүүнүн кереги жок деп мурда да айткам. Алар бизден күн сайын кырдаалды өз пайдасына чече ала тургандай жагдай өнүгүп жатканын көрүп жатышат.
"Биз улам-улам бийликти талашып, кадрларды алмаштырып жатабыз. Болгондо да 20-30 жылдык келечекти көрө билгендерди эмес, акчасы бар, партиялаштарын, туугандарын, жердештерин алып келишет. Ушунун айынан чек-ара маселесинде да уттуруп жатканыбыз көрүнүп жатат", - деп кошумчалады Кочкоров.
Кочкоровдун комментарийинин убактысы 12:00дөн 14:45ке чейин.
