Сабырбек Жумабеков: Ордумду берүүгө даярмын, бирок эмнеге өзүмдү курмандыкка чалышым керек
БНИКТОнун жетекчиси Сабырбек Жумабеков оорукананы менчиктештирүү боюнча айтылгандарды четке какты. Бул тууралуу ал журналисттерге брифинг учурунда билдирди.
Борбордун жетекчиси кетүүгө ниети жок экенин, акырына чейин күрөшөрүн билдирди.
"Мен өз ордумду берүүгө даярмын, бирок эмне үчүн өзүмдү курмандыкка чалышым керек? Бардык жетишкендиктерди жокко чыгаруу үчүнбү? Мен кетпейм жана аягына чейин күрөшөм. Биз министрибизге бул мекеме калкыбыздын жыргалчылыгы үчүн иштеши керек экенин далилдейбиз. Министр телефонун албайт, мен ага көп жолу билдирүү жөнөттүм, жада калса долбоорду да жибергем", - деди Жумабеков.
Дарыгердин айтымында, министр оорукананын аталышындагы "Бишкек" деген сөзгө кыжырданган.
"Министр тез жардам көрсөтүшүбүз үчүн катардагы оорукана кылгысы келип жатат. Ансыз деле бул биздин иш. Бизге баары келишет. Болгону баш кийимин алмаштырат, калган бардык функциялары ошол боюнча калат. Бул жер илимий борбор болбойт. Диссертациялык кеңеш жоголот, эмгектерин коргоо үчүн Россияга барууга мажбур болушат", - деди Жумабеков.
Ал ошондой эле саламаттыкты сактоо министри Алымкадыр Бейшеналиевдин оорукананы менчиктештирүү боюнча айткандарын жокко чыгарды.
"Эч кандай менчиктештирүү жок. Бул мамлекеттик оорукана. Жөн эле калп, көз боемочулук. Бизди Эсеп палатасы текшерип жатат", - деп жыйынтыктады борбордун директору.
