Камчыбек Ташиев Ворух анклавына чейин жол куруу боюнча комментарий берди (видео)
2022-жылдын 29-январында Арзуу аттуу колдонуучу өзүнүн Facebook баракчасы аркылуу УКМКнын төрагасы Камчыбек Ташиев сүйлөп жатканын түз эфирден көрсөткөн.
Анын айтымында, Кыргызстан тажик тарап менен түзүлгөн келишимге ылайык, Капчыгай аймагын бойлой Ворух анклавына баруучу жолду асфальттоого даяр. Бирок, Кыргызстан чек араларды толук делимитациялоо жана демаркациялоону талап кылууда.
"Ачык айтайын, Тажикстандын биринчи жана эң негизги талабы бул Ворух анклавына жол куруу. Ооба, чын эле 2021-жылдын 1-майында №39 протоколдо Ворух анклавына Капчыгай аркылуу жол куруп беребиз деп жазылган. Бирок жолду биз салабыз. Президент дагы буга бизде бардык каражаттар, мүмкүнчүлүктөр бар деп айтты. Жолду курууда эч кандай көйгөй жок. Ал жерде 40000 адам жашайт, жолду жаап коё албайбыз", - деди Ташиев.
Ал ошондой эле чек ара маселелери чечилгенде гана Кыргызстан жол саларын баса белгиледи.
"Эгерде кайсы бир жерде талаш-тартыштуу жагдайлар болсо, Тажикстандын УКМК башчысы экөөбүз ошол жерге барып, эл менен сүйлөшүп, бир чечимге келебиз. Жалаң гана Кыргызстандын же Тажикстандын пайдасына, бир тараптуу чечим кабыл алынат деген жарабайт", - деди Ташиев.
Андан сырткары чек арада көптөгөн көйгөйлөр бар экенин айтты. Кулунду, Интернационал, Арка, Максат, Борбордук аймактарында чек ара маселелери чечилгенден кийин Ортобой, Көк-Терек жана башка аймактардагы башка маселелер чечилет.
"Ушул чек ара көйгөйлөрүнүн баары чечилмейинче чыр-чатактар боло берет", - деди УКМКнын башчысы Ташиев.
***
- 27-январда Баткен облусундагы чек арада кырдаал кайрадан курчуду. Тажикстандын чек арачылары Баткен-Исфана жолунун Баткен районунун Төрт-Көчө тилкесиндеги бөлүгүн тосуп алышкан. Ошондон улам Кыргызстандын Чек ара кызматы кызматтын күчөтүлгөн режимине өттү.
- Тажик аскерлери миномет жана гранатомет колдонгону кабарланды.
- 28-январга караган түнү Кыргыз Республикасы менен Тажикстан Республикасы ок атышууну толук токтотуу, чек арага киргизилген кошумча күчтөрдү жана каражаттарды чыгаруу, Баткен-Исфана унаа жолунда кыймылды ачуу жана чек ара аймактарын биргелешип күзөтүүнү макулдашты.
- КР Саламаттыкты сактоо министрлиги 13 кыргызстандык жабыркаганы тууралуу билдирди.
