Эки жардамчы, үй, унаа. Нарматова депутаттарга жакшы шарт түзүүнү сурады. Видео
Жогорку Кеңештин мандатын жаңыдан алган Надира Нарматова депутаттарды автоунаа, турак жай менен камсыздап, жардамчы, консультант алганга шарт түзүү керектигин айтып чыкты.
Эл өкүлүнүн пикиринде, жакшы шарттар түзүлмөйүн парламентарийлер мыкты иштей албайт. Мындай оюн ал спикерлердин талапкерлиги каралып жаткан учурда билдирди.
"Депутаттарга шарт түзүлбөсө, жардамчы, консультанты болбосо элдин жоопкерчилигин кантип алат? Машинасы, үйү жок болсо, айлык менен жашагандар дагы бар да. Элден миңдеген арыздар келет, анан бир жардамчы менен эмне жумуш аткарат, эч нерсеге жетишпейт. Эгер депутат толук кандуу иштей турган болсо, сөзсүз түрдө бир консультант, бир жардамчы болушу керек", - деди Нарматова.
Нарматованын пикирин Адахан Мадумаров да кубаттап, толук кандуу иш шартын жаратмайынча депутаттардан мыкты иш күтүүгө мүмкүн эместигин билдирди.
"Биринчи кезекте шарт түзүлүшү керек. Чыныгы элдин өкүлү болуп иштейм дегенге бир жардамчы, консультант да аздык кылат. Эгер тийип-качып иштейм десе, анда көптүк кылат", - деди Мадумаров.
Ал эми Талант Мамытов бул маселени депутаттар өздөрү чече турганын айтты.
"Канцелярдык товарларга, авиабилеттерге, бензинге деген депутаттык фонд бар. Балким сунуш берсеңиздер ошонун эсебинен бир катчы, референт алганга шарт түзүлөр. Башка ойлор болсо дагы айтыңыздар, чогуу чечим кабыл алабыз", - деди Мамытов.
Белгилей кетсек, 2015-жылы шайланган VI чакырылыштын депутаттары бир жардымчыдан жана кызматтык унаадан баш тарткан болчу.
Маалымат sputnik.kg сайтынан алынды.
