"Эл үмүтү" партиясынын талапкери капчык толо акчанын сүрөтүн жарыялады. Мыйзам бузулганбы?
"Эл үмүтү" партиясынын талапкери Канышай Рысбекова Instagram баракчасына беш миң сомдук купюралар салынган бир боом акчанын сүрөтүн жарыялаган. Анын айтымында, аны партиянын жалпы эсебине жөнөтөт.
Ошол эле учурда Канышай өзү акчаны белгисиз адамдар которгонун мойнуна алууда. Бул "Шайлоо жөнүндө" конституциялык мыйзамды бузуу болуп саналат: "Шайлоо фонддору" жөнүндөгү 41-беренеге ылайык, ар кандай жашыруун кайрымдуулукка тыюу салынат.
БШКнын сайтындагы маалыматка караганда, Канышай Рысбекова "Эл үмүтү" партиясынын шайлоо фондунан 820 миң сом алган. Бирок, которуунун датасы 1-2-ноябрь.
Партиянын басма сөз катчысы Аскар Алмаз уулу Kaktus.media сайтына учурда партияда сот иштери жүрүп жатканын билдирди. Уюмдун юристтери акча анонимдүү булактардан которулган-которулбаганын иликтеп жатышат. Ал ошондой эле бул иш боюнча кийинчерээк комментарий берерин кошумчалады.
7-ноябрь күнү кечинде Канышай Рысбекова видеокайрылуу таратып, анда ал атын атагысы келбеген адамдан 500 миң сом алганын билдирген.
"Мен бул акчадан баш тарттым. Анткени бул мыйзам боюнча туура эмес. Батир алуу үчүн өзүмдүн топтогон каражатымдан шайлоо фондуна 420 миң сом салдым", - деди ал.
