2:1! КРдин футбол курама командасы БАЭнин курама командасын жеңди. Видео
Футбол боюнча Кыргызстандын олимпиадалык курама командасы (U-23) Азия Кубогу-2022 турнириндеги тандоодо БАЭ курама командасын (U-23) утуп алды. Беттеш 24-октябрда Фуджейра эмиратында (БАЭ) өткөн.
Белгилей кетсек, беттештин фаворити Эмираттардын курама командасы болгон. Дүйнөлүк букмекерлер биздин команданын жеңиши үчүн 13 коэффициентин беришкен.
Биринчи тайм 1:0 эсебинде алардын пайдасына аяктаган. Бирок, 74-мүнөттө Амир Жапаров эсепти теңдеп, 87-мүнөттө жеңиш голун Арлен Шаршенбеков киргизди.
Азия Кубогу-2022 үчүн тандоо оюндары 24-октябрда башталып, 30-октябрга чейин Фуджейра эмиратында (БАЭ) уланат.
Эске сала кетсек, чүчү кулактын жыйынтыгы боюнча Кыргызстан (U-23) Е тайпасына түшкөн. 24-октябрда БАЭ менен беттешти. Эми 27-октябрда Оман менен ал эми 30-октябрда Индия менен ойнойт. Бардык беттештер "Фуджайра клаб" стадионунда жана уюштуруучулардын чечими менен күйөрмандарды киргизбестен өткөрүлөт.
Жаштар континенттик чемпионатынын финалдык бөлүгүндө 11 команда - өз тайпаларынын жеңүүчүлөрү жана экинчи орунду ээлеген эң мыкты төрт команда беттешет. Алдыдагы турнир Өзбекстанда өтөт.
