Ош бийлиги шаардагы эттин баасын 480 сомго түшүрүүнү убада кылды
Бүгүн, 27-июлда Ош шаарынын мэриясында эттин баасы боюнча жумушчу кеңешме болуп өттү.
"Биз бүгүн сиздерди эттин баасына байланыштуу кырдаалды чогуу талкуулап, шаарда бирдиктүү бааны бекитүү үчүн чакырдык. Акыркы үч айда эттин баасы килограммына 460 сомдон 500 сомго көтөрүлдү. Буга байланыштуу , социалдык тармактар аркылуу шаар тургундары мэрияга эттин баасын жөнгө салуу боюнча тиешелүү чараларды көрүү өтүнүчү менен кайрылышат ", - деди вице-мэр Замир Юсупов.
Иш-чаранын алкагында Ош шаарынын монополияга каршы жөнгө салуу агенттигинин бөлүм башчысы Ниязбек Мойдинов шаарда эттин баасы негизсиз кымбат экендигин билдирди. Монополияга каршы жөнгө салуу агенттигинин бөлүмү тарабынан малдын бир бирдигине контролдук союу жүргүзүлүп, анын жүрүшүндө чыныгы баасы аныкталды.
Жолугушуунун жыйынтыгында 30-июлдан тарта эттин баасын килограммына 480 сомго түшүрүү чечими кабыл алынды.
