Европадагы суу ташкындан каза болгондордун саны 17ге жетти
Борбордук Европаны каптаган селден улам каза болгондордун саны 17ге жетти. "Борис" циклону аймакты каптап, бир айдан ашык жаан-чачынга алып келди.
Катуу жаандан Австрия, Польша, Чехия жана Венгрия жабыр тартты. Польшанын өкмөтү өлкөнүн түштүк-батыш аймактарында бир нече күн жааган жамгырдан кийин өзгөчө кырдаал жарыялады.
Чехиянын чек арасында бийликтер отканаларды жапкандан кийин миңдеген тургундар ысык суусуз жана жарыксыз калышты.
Румынияда акыркы бир нече күндө жети адам каза болду. Австрияда жекшемби күнү өрт өчүрүүчү каза болуп, дүйшөмбү күнү 70 жана 80 жаштагы эки кишинин сөөгү үйлөрүнөн камалып калгандан кийин куткаруучулар тарабынан табылды.
Жергиликтүү полициянын маалыматы боюнча, суу ташкынынан Польшада төрт, Чехияда үч адам каза болгон.
Польшанын өлкөнүн түштүк-батышында жайгашкан Ниса шаарынын мэри Кордиан Колбряц жергиликтүү тургундарды дамба бузулуп, шаарга жакын жайгашкан көлдөн суу агып кетпеш үчүн бийик жерге көчүүгө үндөдү.
Польшанын премьер-министри Дональд Туск селден жапа чеккендерге болжол менен 260 миллион доллар бөлүнөрүн айтып, Польша Евробиримдиктен жардам сурап кайрыларын кошумчалады. Тусктун өкмөтү өзгөчө кырдаал жарыялады.
Өлкө боюнча миңдеген адамдар эвакуацияланды. Көптөгөн жерлерде жолдорду сел алып, суу каптап, поезддердин кыймылы токтотулган.
Словакияда Дунай дарыясы эски Братиславаны каптады. Жергиликтүү басылмалардын маалыматына караганда, суунун деңгээли 9 метрге көтөрүлдү, мындан ары дагы көтөрүлөт.
Дунайдын ылдый жагында жайгашкан Венгрия жакынкы күндөрдө суу ташкынына камынып жатат. Дунай боюндагы 500 километрге созулган аймактарды суу каптоо коркунучу бар. Дарыя ар бир 24 саат сайын бир метрге жакын көтөрүлөт.
Будапешттин мэриясы селден коргоо үчүн бир миллион кум кап даярдады.
Дүйшөмбүдөн тарта шаардагы айрым трамвай линиялары ишин токтотуп, дарыя жээгиндеги жолдор жабылды. Будапешт менен Вена ортосундагы поезд каттамдары да токтотулду.
Жаан-чачындын эң көп көлөмү Чехияда болду. Түндүк-чыгыштагы Йесеник шаарында бейшемби күнү эртең менен 473 мм жамгыр жааган, бул бир айлык орточо көрсөткүчтөн беш эсе көп.
Австриянын Сент-Польтен шаарында 1950-жылдагы эң жаанчыл күзгө караганда төрт күндүн ичинде көбүрөөк жаан жааган.
Австрияда жапа чеккен аймактарга жардам берүү үчүн аскерлер жөнөтүлдү. Австриянын Климат министрлиги калыбына келтирүүгө 300 миллион евро бөлүнөрүн билдирди.
Румыниянын чыгышында бүтүндөй кыштактар жана шаарлар суу астында калды.
Дүйшөмбү жана шейшемби күндөрү Австрия, Чехия жана Германиянын түштүк-чыгышында болжол менен 100 мм көбүрөөк жаан жаайт.
Суу каптоо дагы бир нече күнгө созулушу мүмкүн, бирок Борбордук Европада аба ырайы жуманын ортосунан баштап жакшырып, бир топ кургак болот.
Бирок, "Борис" циклону Италиянын түштүгүнө жылып, ал жерде катуу жаан-чачынга алып келет. Өлкөнүн түндүгүндөгү Эмилия-Романья аймагы эң катуу жабыркап, ал жерде 100-150 ммге чейин жаан жаашы күтүлөт.
Борбордук Европадагы рекорддук жаан-чачынга бир катар факторлор, анын ичинде климаттын өзгөрүшү себеп болгон.
