Бишкекте унаа токтотуучу жайлардын баарына акы талап кылынышы мүмкүн
Бишкек шаарындагы унаа токтотуучу жайларга акы талап кылынышы мүмкүн. Президенттин тийиштүү буйругунун долбоору коомдук талкууга коюлду.
Транспорттук каражаттарды жана айдоочулук курамды каттоо боюнча мамлекеттик агенттиктин маалыматы боюнча, учурда Бишкек шаарына каттоосуз кирген унааларды эсепке албаганда 683 миң транспорт бирдиги катталган.
Автоунаалардын санынын көбөйгөндүгүнө байланыштуу азыркы учурдагы унаа токтотуучу жайларды башкаруу системасы заманбап талаптарга жооп бербейт.
Бишкекте эффективдүү унаа токтотуучу системанын жоктугунан унаа тыгыны, каршы тилкеге чыгып кетүү жана башка жол эрежесин бузуулар пайда болуп жатканы белгиленет. Айдоочулар көп учурда унааларын жолдун четине таштап, жолдогу жагымсыз абалды ого бетер курчутат.
Орун алган транспорттук көйгөйлөрдү ийгиликтүү чечүү үчүн, унаа токтотуучу жайларды жана унаа токтотуучу жайларды уюштурууга болгон мамилени кайра карап чыгуу зарыл. Унаа каражаттарынын тармактарын токтотуунун жана тартипке келтирүүнүн негизги механизмдеринин бири акы төлөөнүүчү токтоочу жайларды түзүү болуп саналат.
Акы төлөнүүчү паркинг системалары көптөгөн өлкөлөрдө бар. Эксперттердин айтымында, унаа айдоочулар үчүн көчөлөрдөгү биринчи эсептегичтер 1935-жылы АКШнын Оклахома штатында орнотулган. Унаа токтотуу акысы ар кандай максаттар үчүн киргизилет. Алардын арасында унаалардын кыймылын тартипке келтирүү, жөө жүргүнчүлөрдүн тоскоолдуксуз жүрүшүн камсыздоо жана бюджетти толтуруу да бар.
Заманбап дүйнөлүк тажрыйбаны эске алуу менен Бишкек шаарында унаа токтотуучу жайлардын кызмат көрсөтүүлөрү үчүн дифференцияланган (сааттык) төлөм киргизилет. Муну менен катар борбордун мэриясы шаардын борбордук бөлүгүндө унаа токтотуучу жайлардын биринчи сааты үчүн 25 сомдон төлөм, ал эми кийинки сааттарга 40 сомдон 100 сомго чейинки өлчөмдө тариф коюну пландоодо.
Президенттин жарлыгынын кабыл алынышы Бишкектин жолдорунда унаа токтотуучу жайларды тартипке келтирүүгө мүмкүндүк берет. Бул жол кырсыктарынын санын азайтып, экологияга, калкка жана транспорт системасына жагымдуу шарттарды түзөт.
