Күзгө чейин бир катар мүлк салыгын төлөө зарыл. Тизме

Салык кызматы салык 1-сентябрга чейин бир катар мүлк салыктарын төлөө керектигин эскертет. Мекемеден салыктар өз убагында төлөнбөсө айып салынарын билдирди.

Эмнелерге салык төлөө керек?

• транспорт каражатына салык;
• турак үй, батирге салык (ишкердик иш үчүн пайдаланылбаган);
• үй жанындагы, короо-жай жанындагы жана бак-чарба жер участокторуна салык.

Мүлк салыгын мобилдик жана интернет-банкинг, төлөм терминалдары, ошондой эле банктардын кассаларынан жана почта бөлүмдөрү аркылуу онлайн режиминде жүргүзүүгө болот.

Салыктарды төлөө

• Транспорт каражатына салык төлөө үчүн ээсинин ЖИНин, транспорттун мамлекеттик номерин жана салык мезгилин көрсөтүү керек. Салыктын суммасы автоматтык түрдө эсептелет.
• Үйдүн жанындагы, короо-жай жана бак-чарба жер участокторуна салык төлөө үчүн менчик ээсинин ЖИНин, аймагын жана салыктын суммасын киргизүү керек.
• Турак жай үйлөрүнө жана батирлерге салык төлөө үчүн КМБны (укукту күбөлөндүрүүчү документте көрсөтүлгөн кыймылсыз мүлк бирдигин), зоналык коэффициентти, салык салынбаган аянттын өлчөмүн жана салык мезгилин көрсөтүү талап кылынат.
• Салыктарды cabinet.salyk.kg сайтындагы салык төлөөчүнүн кабинетинде түзүлгөн төлөм коду боюнча же Salyk.kg мобилдик тиркемеси аркылуу оңой жана тез төлөөгө болот. Бул кызматты колдонуу менен салык төлөөчүгө салыктын суммасын эсептөөнүн же кошумча маалымат издөөнүн кажети жок, система баарын автоматтык түрдө жасайт.
• "Салык төлөө" модулунан мүлктүн түрүн жана салыктын мезгилин тандап, тиешелүү мүлктү белгилеп, "Төлөө" баскычын басуу керек. Система мобилдик банк тиркемелери, төлөм терминалдары, банктардын кассалары жана почта бөлүмдөрү аркылуу төлөө үчүн колдонула турган QR-кодду же сандык код түрүндөгү төлөм кодун берет.

Толук маалыматты жергиликтүү салык органдарынан, 116 номеринен же www.sti.gov.kg сайтынан алууга болот.

Башкы беттеги сүрөт иллюстрациялык.