Тиш доктурда каза болгон кыздын окуясы. Айыпталуучунун күйөөсү да камалды
Бишкекте тишин дарылатуу учурунда чарчап калган 3 жашар кыздын өлүмү боюнча айыпталып жаткан тиш доктурдун күйөөсү СИЗОго киргизилди. Бул тууралуу көз карандысыз дарыгерлер профсоюзунун жетекчиси Бермет Барыктабасова Facebook баракчасына жазды.
Айтымында, ал киши Кылмыш-жаза кодексинин документтерди жасалмалоо, кылмышка шериктеш болуу, кылмышты жашыруу өңдүү беренелери боюнча шектелүүдө.
"Ал эч кандай жогорку кызмат адамы эмес, бул медициналык структурада иштеген эмес. Ал таптакыр башка мекемеде иштеген онколог дарыгер. Анын бир гана күнөөсү – Айганыштын күйөөсү жана эки баланын атасы, ал үй-бүлөсүн колунан келишинче коргойт. Ал дагы дарыгер, аялына кесиптеш, эркек, күйөө, коргоочу, күбө катары тынчсызданып жатат", - деп жазган Барыктабасова.
Эскерте кетсек, 2023-жылдын декабрь айында КММАнын медициналык борборунда тиш дарылоо учурунда үч жашар кыз каза болгон.
Аталган факты боюнча Кылмыш-жаза кодексинин 146-беренеси "Медициналык же фармацевтика кызматкеринин кесиптик милдеттерин талаптагыдай эмес аткаруусу" боюнча кылмыш иши козголуп, экспертизалар дайындалган.
Экспертизанын жыйынтыгында кыздын өлүмүнө анальгин жана кетонал препараттарын колдонуунун натыйжасында пайда болгон анафилактикалык шок себеп болгон. Трагедиядан кийин клиниканын анестезиологуна, кийинчерээк тиш доктуруна да айып коюлуп, кийин иш кыйла оор беренеге алмаштырылган.
Көз карандысыз медициналык профсоюз уюмунан билдиришкендей, бүгүнкү күндө бул иш боюнча айыпталуучулар - анестезиолог Айнура, тиш доктур Айганыш, анын жолдошу Данияр, КММАнын медициналык борборунун директору жана жеке стоматологиялык клиниканын директору.
