Садыр Жапаров Париждеги Олимпиада оюндарынын ачылышына катышат
Өлкө башчы Садыр Жапаров Франциянын президенти Эмманюэль Макрондун чакыруусу менен 25-27-июлда Францияга иш сапар менен барат. Бул тууралуу президенттин администрациясынын тышкы саясат бөлүмүнүн башчысы Муратбек Азымбакиев билдирди.
Алдыда боло турган сапардын алкагында 25-июлда Садыр Жапаровдун "Туруктуу өнүгүү үчүн спорт. Тезирээк, бийигирээк, күчтүүрөөк - жакшы келечек үчүн бирге" аталышындагы Париж саммитине катышуусу пландалган.
"Иш-чаранын жүрүшүндө мамлекет башчы Кыргыз Республикасынын балдардын ден соолугуна жана билимине, спортчулардын келечегине жана кийинки муундарына берилгендигин ырастайт.
26-июлда Садыр Жапаров XXXIII Жайкы Олимпиада оюндарынын расмий ачылыш аземине катышат", - деп белгиледи Муратбек Азымбакиев.
Белгилесек, Олимпиада оюндарына Кыргызстандан 16 спортчу спорттун беш түрү: күрөш, бокс, дзюдо, жеңил атлетика жана сууда сүзүү боюнча күч сынашат.
