Ишкерден 10 млн сом талап кылганга шектелгендер акча алып жатканда кармалды
Ош облусунун Чоң-Алай районунда ишкерден 10 миллион сом опузалагандар кармалды. ИИМдин маалыматына караганда, алар талап кылынган акчаны алып жатканда колго түшүрүлгөн.
Ишкер 18-июнда ички иштер органдарына арыз менен кайрылып, Чоң-Алай районунун Карамык айылында көмүр казуу иштери башталганын, ага айрым адамдар тарабынан коркутуп-үркүтүүлөр болуп, 10 миллион сом акча талап кылып жатканын билдирген.
Текшерүү учурунда А.Н. аттуу ишкер көмүр казуу боюнча иштерин баштаган учурда өздөрүн "жергиликтүү жашоочуларбыз, толук кандуу иш жүргүзүүгө жол бербейбиз" деп коркутуп, акча талап кылганы белгилүү болгон.
Бул факты боюнча топтолгон материалдардын негизинде 208-беренеси (Опузалап талап кылуу) боюнча кылмыш иши козголгон.
Кармалгандар убактылуу кармоочу жайга киргизилди. Иш боюнча тергөө иштери уланууда.
