Бишкекте таштандыларды жок кылуучу завод курулат. Акылбек Жапаров капсула салды
Акылбек Жапаров Бишкек шаарында катуу тиричилик таштандыларын жок кылуу менен электр энергиясын өндүрө турган эко-технологиялык заводдун курулушуна капсула салды. Министрлер кабинетинен билдиришкендей, иш-чарага борбор калаанын мэри Айбек Жунушалиев, Кытай Эл Республикасынын Кыргызстандагы элчиси Ду Дэвэнь, кытайлык "Хунан Цзюнсин" компаниясынын директору Дай Даогуо да катышты.
Акылбек Жапаров акыркы жылдары борбордо экология маселеси курч болуп жатканын белгиледи. Эки жылдан бери шаардын абасын булгоочу стационардык булактарды жоюу боюнча иштер жүргүзүлүп, анын ичинде турак жайларды газдаштыруу иштери жүргүзүлүп, автономдуу от казандары газга өткөрүлүп, коомдук транспорттун экологиялык жактан таза түрлөрү сатылып алынганын, "Жашыл мурас" демилгесинин алкагында 600 миңден ашык жашыл дарактар отургузулганын белгиледи.
"Бишкектеги санитардык полигонго тиричилик таштандыларын кайра иштетүүчү завод керек болчу. Бүгүнкү күндө катуу тиричилик таштандыларын утилизациялоо менен электр энергиясын өндүрүүчү заводдун курулушун баштайбыз. Тазалоо системалары, турак-жай, спорттук имараттар да курулат. Бул долбоор биз үчүн маанилүү. Ишкананын ишине ийгилик каалайбыз", - деди ал.
Акылбек Жапаров өкмөт өлкөнүн 7 облусунда жана 2 шаарында таштандыларды кайра иштетүүчү жана таштандыларды жок кылуучу заводдорду курууну артыкчылыктуу деп эсептээрин айтты.
Иш-чаранын алкагында жашыл аянтчалар отургузулду.
Маалымат үчүн: Санитардык полигондун аймагына куруу пландалып жаткан таштандыларды кайра иштетүүчү завод суткасына 850 тоннага жакын таштанды жок кылат.
Заводдун аймагында төмөнкү өндүрүштүк линиялар курулат: таштандыларды өрттөөчү приборлор, электр энергиясын иштеп чыгуучу генераторлор, тазалоо системалары, турак жай, спорттук имараттар.
Долбоор тиешелүү калыбына келтирүү казандары жана турбогенераторлор менен жабдылган механикалык колонна мешинин технологиясын колдонот. Түтүн газын тазалоонун көп баскычтуу системасы колдонулат, ал төмөнкүлөрдү камтыйт: деоксидация үчүн денитрификацияны колдонуу, жарым кургак реакция колонкасы, активдештирилген көмүрдүн адсорбциясы, коргоочусу орнотулган чаңды тазалоо үчүн баштык чаң коллектор. Комплекстүү процессте чаң шлактары полигонго ташылып, күл химиялык реагенттер менен дезинфекцияланат.
Заводдун бүткөрүлүшү 2025-жылдын ноябрь айында күтүлүүдө.
