Таалайбек Рысалиев (Моби) Дубайдан Бишкекке жеткирилди
Издөөдө жүргөн Таалайбек Рысалиев (Моби) 21-февралда УКМК жана Интерполдун Улуттук борбордук бюросу менен биргеликте БАЭде кармалды.
Коопсуздук комитеттен маалымдашкандай, буга чейин козголгон кылмыш ишинин алкагында Рысалиев Камчы Көлбаевдин (Асанбек) уюшкан кылмыштуу тобунун активдүү катышуучусу экени аныкталган.
Ага Кылмыш-жаза кодексинин 261-беренесинин 2-бөлүгү менен айып тагылып, Бишкек шаарынын Биринчи Май райондук соту тарабынан баш коргоо чарасы сырттан каралып, камакка алынган.
Таалайбек Рысалиев кримтөбөл Камчы Көлбаевдин жакын адамы болуп, анын таасирин туруктуу, мыйзамсыз киреше алуу максатында, тагыраагы түздөн-түз же кыйыр финансылык же башка материалдык пайда алуу максатында жеке менчикке каршы оор кылмыштарды жасоо, ошондой эле башка кылмыштуу ойлорду ишке ашыруу үчүн пайдаланган.
Таалайбек Рысалиев Кыргызстанга экстрадицияланганын Kaktus.media сайтына комитеттен ырасташты.
