Сулайман-Тоодон кулап түшкөн кыз ооруканада каза болду
Ош облусунда Сулайман-Тоодон 28 жаштагы кыз кулап, бир нече күндөн кийин каза болду. Мындай маалыматты Ош шаардык ички иштер башкармалыгынан Kaktus.kg сайтына билдиришти.
18-январда саат 14:00-15:00 чамасында милицияга Сулайман-Тоодо белгисиз жаран эс-учун билбей жатат деген кабар түшкөн. Жерине ыкчам топ менен "Тез жардам" кызматы барышкан.
Жабыркаган жаран Анар кичи районунун 1996-жылы туулган тургуну экени такталып, ал Ош шаардык ооруканасынын жандандыруу бөлүмүнө жаткырылган.
"Жабырлануучунун алган жаракаты оор болгондуктан 13-февралда каза болуп калды. Окуя боюнча тергөө кызматы иш жүргүзүүдө. Алгачкы маалыматтарга караганда, кыз Сулайман-Тоого чыкканда кокусунан тайгаланып, кулаган. Камералардагы видеодон анын тоого жалгыз барганын көрүүгө болот", - дешти милициядан.
Ош ШИИБден кошумчалашкандай, аталган факты кокустук катары катталып, текшерүү жүрүүдө.
