Арстан Алай январга чейин камакка алынды
Диний кастыкты козутууга шектелип кармалган Арстанбек Абдылдаев (Арстан Алай) январга чейин камакка алынды. Kaktus.kg сайтына шаардык соттон билдиришкендей, чечимди Октябрь райондук соту кабыл алган.
16-декабрда Октябрь райондук соту УКМКнын Чүй облустук башкармалыгынын тергөөчүсүнүн өтүнүчүн жарым-жартылай канааттандырып, Арстан Алайды 2024-жылдын 15-январына чейинки камакта калтырды.
УКМКнын маалыматына караганда, А.Абдылдаевди кармоого Facebook, Instagram жана YouTube социалдык түйүндөрүндө, ошондой эле китептерде жана брошюраларда диний жана диндер аралык кастыкты козутууга багытталган чакырыктарды камтыган, ошондой эле динчилдиги боюнча жарандардын ким экендигин пропагандалоо тууралуу алынган маалыматтар негиз болгон. Ал өзүн "Жаңы Кудай", "Куткаруучу" деп эсептеп, башка диндерди, ишенимдерди, көз караштарды төмөн, алсыз жана жараксыз адашуу деп эсептеп, аларга терс баа берген.
Жашаган жеринде жана Чүй облусунун аймагындагы лекцияларын (мантра деп аталган) өткөргөн жайларында тинтүү жүрүп, китептер, брошюралар жана дептерлер, компьютерлер жана электрондук алып жүрүүчүлөр алынган.
