"Кыргызстан сулуусу-2023" сынагынын жеңүүчүлөрү аныкталды. Гран-прини ким утту?
Кечээ, 3-октябрда Бишкекте "Кыргызстан сулуусу-2023" сынагы болуп өттү. Анда 17 сулуунун ичинен 3 бийкеч өлкө сулуусу деп табылды.
Ал эми Гран-прини 21 жаштагы бийчи, модель Акылай Калбердиева жеңип, таажыны "Кыргызстан сулуусу-2022" наамынын ээси Диами Алмазбекова өткөрүп берди.
Сулуулар сынагында:
- 21 жаштагы Акылай Калбердиева жеңүүчү деп табылып, акчалай байгеге ээ болду;
- 25 жаштагы Майя Турдалиева эл аралык Miss Universe сынагына катышуу укугун алды;
- 21 жаштагы Айпери Кеңешбекова эл аралык Miss Earth сынагына катышууга укук алды;
- Сынакта "Бишкек сулуусу" да аныкталды, ал 22 жаштагы Айгерим Сатымбек кызы болду.
Сынактын уюштуруучусу Рысгүл Намазбекова Kaktus.kg сайтына Кыргызстандын сулуусу болуп 3 бийкечтин тандалганы боюнча буларды айтты.
"Быйыл сынактын шарттары, эрежелери өзгөрдү. Буга чейин бир эле кыз жеңүүчү болуп, бир кызга эле таажы тагылчу. Бул жолу атайын 3 окшош таажы буюртма кылдык. 3 кыз тең Кыргызстандын сулуусу деген наамга татыктуу. Анын экөө эл аралык сынактарга барганга укук алат", - деди.
Акылай Калбердиева тууралуу бир нече факты
- Жердиги Жалал-Абаддан, бирок Бишкекте өскөн
- Кичине кезинен бери бийлейт, бийге болгон кызыгуусу көркөм гимнастикадан башталган
- Заманбап бий менен 7 жыл алектенген
- Клипке алгачкы жолу 11 жашында тартылган (Азамат Сарыбаевдин "Кумар көз" деген ырынын клиби)
- 10 жылдан ашуун убакыттан бери "Береке" бий ансамблинде бийлеп келет
- Моделдик менен алектенгенине 5 жылдан ашты
- Финансы-экономикалык техникумду аяктаган соң, Кыргыз улуттук университетинин котормочулук багытында билим алып келет
Майя Турдалиева тууралуу маалымат
- Туулган жери Ысык-Көл облусу
- Бишкектеги түрк лицейинде билим алып, жогорку билимди Кытайдагы Фудань университетинде алган
- Кытайда жүргөндө модель катары жана англис тилден окутуучу болуп эмгектенген
- Кыргызстанга 3 жыл мурда келип, учурда модель катары иштейт
Айпери Кеңешбекова тууралуу маалымат
- Чүй облусунун Кара-Балта шаарында төрөлүп, чоңойгон
- И. Арабаев атындагы Кыргыз мамлекеттик университетинин 4-курсунун студенти
- Үй-бүлөлүү
- Модель катары, андан тышкары телеканалдардын биринде иштейт
