Футзал боюнча кыргызстандык экс-калыс Гиннестин рекорддор китебине кирди
ФИФАнын футзал боюнча кыргызстандык экс-калыс Нурдин Букуев Гиннестин рекорддор китебине кирди. Бул туурасында Кыргызстандын футбол союзунан кабарлашты.
Букуев футзал боюнча Дүйнө чемпионатын тейлөө саны боюнча дүйнөнүн абсолюттук рекордчусу, ошондой эле бул көрсөткүчкө жеткен биринчи жана жалгыз футзал калысы. Анын эсебинде төрт дүйнөлүк биринчилик бар: алар Бразилия-2008, Таиланд-2012, Колумбия-2016 жана Литва-2021 Дүйнө чемпионаттары.
Кыргыз футболдук союзундагы көп жылдык кызматынан кийин Букуев 2021-жылы анын башкы катчысы болуп дайындалып, ушул күнгө чейин аталган кызматта иштеп келет.
2022-жылы өлкөдө футболду жана анын түрлөрүн жайылтууга жана өнүктүрүүгө кошкон салымы үчүн мамлекеттик "Даңк" медалы менен сыйланган.
Букуев быйыл АФКнын Калыстар комитетине да мүчө болуп, учурда өз ишмердүүлүгүн эл аралык мелдештердеги инспекторлук иши менен айкалышырып келет.
