Эрулан Кокулов министрдин кабинетине кантип киргенин түшүндүрдү
Жогорку Кеңештин депутаты Эрулан Кокулов билим берүү жана илим министри Каныбек Иманалиев менен болгон окуяга комментарий берди. Бир күн мурда эл өкүлү менен министр урушуп кеткен видео тараган.
Депутат Kaktus.media сайтына түшүндүргөндөй, ал чиновниктин кабинетине кирбей, кабыл алуу бөлмөсүндө көпкө күткөн.
"Министрдин жыйыны бар экен, күтө тур дешти. Бирок мен күтүп отурсам бир нече адам кирип-чыгып жатты. Мен чыдабай кирип кеттим. Министр кабинетке атырылып кирип кеткенимди айтты, бирок сылык түрдө тыкылдатып, уруксат сурадым", - деди парламентарий.
Ал ошондой эле социалдык тармактарда сынга алынган "кийими" маанилүү эмес экенин кошумчалады. "Кандай кийим кийип жүргөнүм маанилүүбү? Кандай суроо менен келгеним маанилүүрөөк деп ойлойм. Ата-энелерден көп кайрылуулар түшүп жатат. Мен ошол үчүн баргам", - деди Кокулов.
Бул окуя боюнча парламентте депутаттар өз пикирлерин айтышты.
