Астанада казак мушкери Бейбут Шуменов баласын кармап турган кыргызстандыкты сабап салган
Астанадагы соода жана оюн-зоок борборлорунун биринин фудкортунда мушташ чыгып, анын жүрүшүндө бири кичинекей баланы колуна кармап турган адамды, мушкер сабап салган. Маалым болгондой, жаңжалдын катышуучуларынын бири казакстандык профессионал мушкер Бейбут Шуменов, ал эми баласы бар адам Кыргызстандын жараны экени белгилүү болду.
Окуянын чоо-жайы
Маалым болгондой, окуя ушул жылдын 18-июнунда болгон. Алдын ала маалыматтарга караганда, чырдын келип чыгышына алардын балдарынын оюн аянтчасында урушу себеп болгон. Видеодон мушкер эркекти мойнунан кантип кармап, ал өз кезегинде аны түртүп жиберип, мушташ башталганын көрүүгө болот.
Ишти жабууга аракет кылышкан
Окуя болгон жерге патрулдук милиция келип, мушташтын катышуучуларын аныктап, жабырлануучуну соттук-медициналык экспертизага жөнөтүшкөн. Андан соң материалдар райондук милиция кызматкерине жөнөтүлүп, ал өз кезегинде андан кылмыштын курамын таппай, ишти ийгиликтүү жаап салган. Бул тууралуу жабырлануучу тараптын кызыкчылыгын коргогон адвокат Ержан Талгатов билдирди.
Жабыркаган тарап мушташкан видеону жарыялагандан кийин гана укук коргоо органдарынын реакциясы: бейбаштык, башкача айтканда, орточо оордуктагы кылмыш боюнча кылмыш иши козголгон.
Казак бийлигинин реакциясы
Бул окуяга Казакстандын ички иштер министринин орун басары Кайрат Сунтаев да комментарий берди. Анын айтымында, бул иш менен тиешелүү органдар алектенип, бул ишти "жаап салган" участкалык инспекторго карата кызматтык текшерүү башталды.
"Текшерүү жүрүп жатат, ал катуу жазаланат, жакында эле министр бул маселени көтөрдү", - деди Сунтаев.
Сунтаевдин айтымында, мушташ учурунда Шуменов соо болгон. Окуядан жабырлануучунун баласы жабыркаган эмес.
"Жок, бала жабыркаган эмес, бирок жабырлануучу кылмыш ишин козгоону талап кылууда", - деп кошумчалады Казакстандын ички иштер министринин орун басары.
Боксчунун комментарийи
Бул окуя боюнча мушкер Бейбут Шуменов өзүнчө интервью берип, анын жүрүшүндө жабырлануучу Кыргызстандын жараны экени белгилүү болгон (ага чейин Казакстандын бийлиги жана ММКлары жабырлануучунун жарандыгын жарыялабаганга аракет кылып, аны Астананын жашоочусу деп жатышкан - ред. Kaktus.media). Спортчунун айтымында, анын сегиз жашар уулун соода борбордун аянтчасында дагы бир бала сабап кеткен, ага байланыштуу ал бул баланын атасы менен сүйлөшүүгө барган. Эркектердин ортосунда оозеки жаңжал башталып, ал мушташка айланган. Бейбут Шуменов жабырлануучу ошол маалда бычак менен кол салганын айтып, өзуү актоого аракет кылган.
Белгилей кетсек, видеодо Бейбут Шуменовдун баласы менен уруша кеткен бала көрүнбөйт. Кол салуу учурунда жабырлануучу кичүү уулун колунда кармап турган.
***
Бейбут Шуменов – казакстандык профессионал мушкер, жеңил салмакта жана биринчи оор салмакта күч сынашкан. 2009-жылдан бери ар кандай версияларда чемпиондук наамдардын ээси. 2016-жылы Шуменов бир эле учурда эки салмак категориясында биринчи казак чемпиону болгон: жеңил оор (WBA super) жана биринчи оор (WBA Regular). 2019-жылы алган жаракатынан улам мушташа албай калып, анын жыйынтыгында чемпиондук наамы франциялык мушкер Арсен Гуламирянга өтүп кетсе, Шуменов өзүн "эс алуудагы чемпион" деп жарыяланган.
