Министрлер кабинети көчөлөрдөгү жарыкты өчүрүүгө жана электр энергиясын үнөмдөөгө чакырды
Кыргызстандын бийлиги Токтогул суу сактагычында суунун аздыгынан улам кыргызстандыктарды электр энергиясын үнөмдөөгө чакырууда. Бул тууралуу Кыргыз Республикасынын Министрлер Кабинетинин Төрагасынын орун басары Бакыт Төрөбаевдин жетекчилиги астында экономиканын тармактарын жана калкты жылытуу мезгилине даярдоо боюнча республикалык штабдын отурумунда белгилүү болду.
Ал болжолдор боюнча 2023-жылдын 1-октябрына чейин Токтогул суу сактагычында күтүлгөн 14,3 миллиард куб метрдин ордуна 12,4 миллиард куб метр гана суу топтолгондугуна байланыштуу электр энергиясынын лимитине катуу көзөмөл жүргүзүүнү тапшырды.
"Акимдерден баштап, мамлекеттик мекемелердин жетекчилерине чейин "Кыргызстандын улуттук тармактары" ААКсы менен биргеликте электр энергиясын колдонуунун лимиттерин катуу көзөмөлгө алуу зарыл", - деп чакырды ал.
"Борбордук көчөлөрдө жарыкты өз убагында өчүрүү зарыл. Учурда Токтогул суу сактагычындагы сууну үнөмдөө зарыл", - деди Бакыт Төрөбаев.
Жыйынга тиешелүү ведомстволордун өкүлдөрү катышты. Алар Ош жана Бишкек шаарларындагы ЖЭБге көмүр жана мазут жеткирүү, энергетикалык жабдууларды оңдоо иштери планга ылайык жүргүзүлүп жатканын билдиришти. Калкты көмүр менен камсыздоонун баасы талкууланды.
"Эгерде жеке менчик көмүр өндүрүүчү ишканалардын көмүрдү экспорттоосу жергиликтүү рынокто анын өздүк наркын негизсиз жогорулатып жиберсе, министрлер кабинети аны ташып чыгууга тыюу салат. Биринчи кезекте көмүр казуучу ишканалар бюджеттик уюмдардын жана калктын муктаждыктарын камсыздоого тийиш", - деди Төрөбаев.
