"Бул жакшы адам эмес." КММАнын ректору депутаттарды Хашим Зайналиевди колдобоого чакырды

Кыргыз мамлекеттик медициналык академиясынын ректору Индира Кудайбергенова дарыгер Хашим Зайналиевдин демилгесин колдобоону өтүнүп, депутаттарга кайрылды. Мындай өтүнүчүн ал "Кыргыз Республикасындагы жарандардын саламаттыгын коргоо жөнүндө" мыйзам долбоорун коомдук талкуулоодо билдирди.

"Аны колдобогула. Бул эң жаман. Бул киши адамдарды өлтүрүп жатат. Мен онколог катары айтам. Канча бейтаптарыма операция кылайын, аны кылайын, муну кылайын дегенде болбой, ден-соолуктарынан эле эмес, өмүрүнөн айрылышты. "Жок. Бул киши өзүнө алат да, алар өлүп жатышат". Аны колдобош керек. Ал жаман адам. Өзү билет, мен аны менен сүйлөшкөм, "Кудайдын каарына калбаңыз, андай кылууга болбойт", - деди Кудайбергенова.

Буга чейин бейтаптар бирикмесинин жетекчиси Гүлмира Абдыразакова элдик медицина боюнча мыйзам долбоорунун демилгесинин артында дабагер турганын билдирген. Ал псевдо-онкологдун столунда аял каза болгонун эске салган. Депутат Камила Талиева ага депутаттар дарыгерлердин пикирине таяна турганын айткан.

Эске сала кетсек, май айынын соңунда депутат Шайлообек Атазов "Элдик медицина жөнүндө" мыйзамды иштеп чыгууну сунуштап, муну дабагерлердин кайрылуусу менен негиздеген. Ал мыйзам долбоорун Саламаттыкты сактоо министрлигинин өкүлдөрүнүн катышуусунда талкуулоону сунуштаган.

Ал арада салттуу медицина боюнча норма "Жарандардын ден соолугун коргоо жөнүндө" мыйзамдын беренесинде жазылган.

Эске салсак, сот Зайналиевге ишкерлик кылууга тыюу салып, мыйзамсыз ишкердик кылганы үчүн 100 миң сом айып салган. Биринчи инстанциядагы сот февраль айында чечим чыгарган. Ушундай эле чечимди Бишкек шаардык соту да чыгарган. Кыргызстанда медициналык практикага тыюу салынгандан кийин дарыгер-онколог өз тажрыйбасын чет өлкөдө улантарын билдирген. Бирок ал кайтып келип, практикасын ушул жерден уланткан.