Сот жообуна тартылган БШКнын мүчөсүн депутаттар кызматтан алды
Жогорку Кеңештин депутаттары БШКнын соттолгон мүчөсү Акылбек Эшимовду кызматынан бошотту. Бул тууралуу Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитетинин жыйынында белгилүү болду.
Комитеттин мүчөлөрү пара алуу үчүн соттолгон БШК мүчөсү боюнча чечимди бир добуштан колдошту.
*****
Экс-депутат, Борбордук шайлоо комиссиясынын мурдагы мүчөсү Акылбек Эшимов 2021-жылы сентябрда кармалган. Ал 2020-жылдын күзүндө өткөн парламенттик шайлоодо саясий уюмдан депутаттыкка талапкерлердин алдыңкы бештигине кирүү үчүн "Кыргызстан" партиясынан талапкер А.Досалиевден 550 миң доллар алган деп шектелген.
2022-жылы Бишкектин Биринчи Май райондук соту анын баш коргоо чарасын эч жакка чыкпоо түрүнө өзгөрткөн. Бирок 26-октябрда Бишкек шаардык сотунун кылмыш иштери жана жоруктар боюнча соттук коллегиясы аны ушул "Алдамчылык" беренесинин 3-бөлүгүндө каралган кылмышты жасагандыгы үчүн күнөөлүү деп таап, беш жылга эркинен ажыратылган. Кылмыш-жаза кодексинин 82-беренесине ылайык, үч жылдык мөөнөткө пробациялык көзөмөлгө алынган.
2023-жылдын 11-майында Жогорку Соттун соттук коллегиясы Бишкек шаардык сотунун 2022-жылдын 26-октябрындагы өкүмүн күчүндө калтыруу чечимин кабыл алган.
Жыйынтыгында Эшимов күнөөлүү деп табылып, үч жылга пробациялык көзөмөл колдонуу менен беш жылга эркинен ажыратылды.
