Сузакта эки жашыруун медресе табылды (фото)
Сузак районунда жер астындагы эки медресенин ишмердүүлүгү токтотулду. Бул тууралуу УКМКнын басма сөз кызматы билдирди.
Мекеменин маалыматына караганда, Сузак районунун Тотуя айылында 2022-жылдын аягынан бери эркек жана аял медреселери эч кандай уруксаты жок иштеп келген. Эркектердин имаратында 9 жаштан 18 жашка чейинки 25тен ашык бала окуп, жашаган. Медреседе күн сайын саат 08:00дөн 17:00гө чейин сабак өткөндүктөн, жашаган жеринде алар орто мектептерге барышкан эмес.
Аялдар медресесинде жергиликтүү тургундардан 40ка жакын аял жана 10 бала окуган. Сабактар жума сайын дүйшөмбүдөн бейшембиге чейин саат 09:00дөн 16:00гө чейин өткөрүлүп келген. Жашы жете элек окуучулар да орто мектептерге барышкан эмес.
Бул медреселерде диний сабактарды диний билими жок мугалимдер өтчү. Алар негизинен Муфтият тарабынан текшерилбеген адабияттарды колдонуп, Куран окуу жана хадис таанууну үйрөтүшкөн.
Текшерүүнүн жыйынтыгы боюнча медресенин ар бирине 5500 сомдон айып пул салынып, ишмердүүлүгү токтотулду.
