Садыр Жапаровдун Кытайдагы мамлекеттик сапары аяктап, Бишкекке келди
Садыр Жапаровдун 17-20-майда Кытай Эл Республикасына болгон биринчи мамлекеттик сапары аяктады. Президент 18-майда Сиань шаарында Кытайдын төрагасы Си Цзиньпин менен эки тараптуу сүйлөшүүлөрдү өткөрдү деп билдирди администрациядан.
Эки өлкөнүн лидерлери эки тараптуу жана көп тараптуу кызматташуунун актуалдуу маселелерин, жогорку деңгээлдеги макулдашууларды жана түрдүү тармактарда биргелешкен долбоорлорду ишке ашырууну талкуулашты.
Кытай-Кыргызстан-Өзбекстан темир жолун куруу долбооруна өзгөчө көңүл бурулуп, аны ишке ашырууну тездетүүнүн маанилүүлүгү баса белгиленди.
Сүйлөшүүлөрдүн жыйынтыгында Садыр Жапаров менен Си Цзиньпин Кыргызстан менен Кытайдын жаңы доордо ар тараптуу стратегиялык өнөктөштүктү орнотуу боюнча биргелешкен декларациясына кол коюшту. Мындан тышкары мамлекеттик сапардын алкагында бир катар эки тараптуу документтерге кол коюлду.
Жогорку деңгээлдеги сүйлөшүүлөрдөн жана кол коюу аземинен кийин президент Садыр Жапаров Кытайдын ири бизнес чөйрөсүнүн өкүлдөрү менен жолугушуп, аларды Кыргызстандагы артыкчылыктуу долбоорлорду ишке ашырууга катышууга чакырды.
Ошол эле күнү кечинде мамлекет башчы биринчи айым Айгүл Жапарова менен бирге Кытай Эл Республикасынын Төрагасы Си Цзиньпин менен Борбордук Азия мамлекеттеринин башчыларын тосуп алуу аземине катышты.
Мамлекеттик сапардын кийинки күнү, 19-майда Садыр Жапаров "Борбор Азия-Кытай" саммитине катышып, анын жыйынтыгында Сиань декларациясы жана бир катар көп тараптуу документтер кабыл алынды.
Андан ары Пекинде Кытайдын Мамлекеттик кеңешинин премьери Ли Цян жана КЭР Элдик саясий консультациялык кеңешинин (КПСС) Улуттук комитетинин төрагасы Ван Хунин менен эки тараптуу сүйлөшүүлөр болду.
Мамлекеттик сапардын акыркы күнүндө, 20-майда мамлекет башчысы Шаньдун провинциясынын Цзинань шаарында газ менен жүрүүчү автобус заводунун иши менен таанышты. Буга чейин, аталган заводдон 120 автобус Бишкек шаарына сатып алынган. Алар борбордун жолдорунда ийгиликтүү сыноодон өтүп, ага байланыштуу бюджеттик каражаттардын эсебинен Бишкекке алынып келинген бул маркадагы 1000 автобустун кошумча партиясын сатып алуу чечими кабыл алынды.
Заводдо Кыргызстан үчүн жасалган миңинчи автобусту салтанаттуу түрдө чыгаруу жана тапшыруу аземи болду.
Садыр Жапаров Шаньдун провинциясынын партиялык комитетинин катчысы Лин Ву менен жолугушкандан кийин аймактар аралык кызматташуунун актуалдуу маселелери боюнча пикир алышты.
20-май күнү кечинде президент Кытайга биринчи мамлекеттик сапарын аяктаган соң Бишкекке кайтып келди.
