Кыргызстан кылмышка шектүүлөрдү электрондук билерик аркылуу көзөмөлдөөнү карап жатат
Акылбек Жапаров кылмышка шектүүлөргө электрондук билерик (электрондук байкоо) түрүндө мониторинг жүргүзүүнүн жаңы системасын киргизүү маселесин талкуулаган жыйын өткөрдү. Маалыматты Министрлер кабинетинен кабарлашат.
Жыйында юстиция министри Аяз Баетов электрондук билериктердин жардамы менен кылмышка шектүүлөрдүн жайгашкан жерин жана алардын аракеттерин көзөмөлдөө мүмкүн болорун белгиледи.
"Бул технология укук бузуулардын санын кыскартууга жана укук коргоо органдарынын ишинин натыйжалуулугун жогорулатууга жардам берет. Электрондук билериктерге карата ыкчам иликтөө иш-чаралары жүргүзүлүп жаткан шектүүлөрдү көзөмөлдөөнүн милдеттүү элементи болуп калышы мүмкүн, ошондой эле үй-бүлөлүк жана аялдарга карата зомбулук бир топ кыскартууга жардам берет", - деди юстиция министри.
Электрондук билериктер түзөтүү мекемелеринин жүгүн азайтып, пенитенциардык системаны өнүктүрүүнүн жаңы этабы болуу менен, укук коргоо органдарынын ишинин сапатын жогорулатууга жана жарандардын коопсуздугун жогорулатууга жардам берери айтылды.
Белгилей кетсек, электрондук байкоо түрүндөгү бөгөт коюу чарасы оор жана өзгөчө оор кылмыштарды жасаган шектүүлөргө карата колдонулбайт.
Жыйындын соңунда Акылбек Жапаров мыйзам талаптарын эске алуу менен бул системаны ишке киргизүү боюнча башка өлкөлөрдүн тажрыйбасын изилдеп, каржылык эсептөөлөрдү так жүргүзүүнү тапшырды.
Башкы беттеги сүрөт иллюстрациялык: РИА Новости / Алексей Даничев.
