GovoriTVнын журналистин шаардык соттун имаратынан күч менен чыгарып салышты
Govori TVнын журналисти Гүлназ Мидинова Бишкек шаардык сотунун сот аткаруучулары тарабынан имараттан күч менен чыгарылды. Бул тууралуу Kaktus.media сайтына аталган басылманын жетекчиси Кайыргүл Урумканова билдирди.
Анын айтымында, шаардык соттун сот аткаруучулары журналистке эч кандай негизсиз кол салышкан.
"Ал Эрлан Бекчороевдин баш коргоо чарасын өзгөртүү боюнча соттук процессти чагылдырууга барган, отурум баштала элек болчу, ал аппаратураны орното баштаганда капысынан сот аткаруучулар кармап алышып, себебин түшүндүрбөстөн сыртка алып чыгышкан", - деди Урумканова.
"Бул формачан адамдар мамлекеттик мекеменин кызматкерлериби же бандиттерби?! Соттук процессти чагылдырып жаткан журналисттин кол тийбестиги бар. Анда эмнеге бул формачан адамдар күч колдонуп, журналистти сот залынан эле эмес, имараттан да чыгарышты?", – деп жазды Урумканова социалдык тармактарга.
Ал белгилегендей, жабырлануучу сот аткаруучулардын мыйзамсыз аракеттери боюнча милицияга кайрылууга ниеттенүүдө.
Ал арада Жогорку Сотко караштуу Сот департаменти GovoriTVнын журналистинин Бишкек шаардык сотунун имаратынан чыгарылышына комментарий берди.
Аталган мекеме Кемпир-Абад окуясы боюнча соттук отурумдар судьянын көрсөтмөсүнүн негизинде жабык эшик артында өткөнүн билдирди.
"Биринчи жана экинчи кабаттын ортосундагы тепкичке жаран сумкасын коюп, Бишкек шаардык сотунун короосунда жайгашкан конвойду тарта баштаган, бул имараттын экинчи кабатына соттун катышуучуларынын өтүшүнө тоскоолдук кылган. Сот аткаруучу аны 1-кабатка түшүп, тоскоолдук кылбоону өтүнгөн бирок, журналист кыйкырып, жаңжал чыгарган. Ал паспортун көрсөтүү талабынан баш тарткан. Андан кийин бул жаранды соттун имаратынан чыгарууга туура келген", - деп билдиришти департаменттен.
Ведомство ошондой эле "Сот приставдары жөнүндө" мыйзамдын 9-беренесине ылайык, сот аткаруучулар укук бузуулардын алдын алууга жана бөгөт коюуга милдеттүү, алар жарандардан жана кызмат адамдарынан коомдук тартипти сактоону, укук бузууларды жана башка мыйзамсыз аракеттерди токтотууну талап кылууга укуктуу экенин эскертти. Мыйзамдуу талаптар аткарылбаган учурда сот аткаруучулар жогоруда көрсөтүлгөн мыйзамда каралган мажбурлоо жана бөгөт коюу чараларын колдонууга укуктуу.
"Бишкек шаарынын соттук аткаруучулар кызматынын тиешелүү аймактык бөлүмүнөн билдирүүлөр келип, тараган видеоматериалдар, ошондой эле келип түшкөн документтер иликтенип жатат. Бул окуя боюнча кызматтык иликтөө жүргүзүлүп, жыйынтыгы чыгарылат. Кошумча маалымат берилет", - деп айтылат Сот департаментинин маалыматында.
Журналист өз кезегинде бул окуя боюнча сотко кайрылуу ниетинде.
