Назым Мендебаировдун агасы, режиссёр Шамбет Мендебаиров каза болду
Нарын театрынын режиссёру Шамбет Мендебаиров каза болду. Маданият, маалымат, спорт жана жаштар саясаты министрлигинен билдиришкендей, режиссёр 1-майда 51 жашында мезгилсиз дүйнө салды.
Шамбет Мендебаиров Кыргыз мамлекеттик академиялык драма театрынын көркөм жетекчиси, режиссёр Назым Мендебаировдун бир тууган агасы. Ал 1972-жылы Нарын облусуна караштуу Жумгал районунун Чаек айылында туулган.
Б.Бейшеналиева атындагы Кыргыз мамлекеттик искусство институтунун "Театр жана кино" факультетинин "Режиссура" кафедрасын аяктаган. Окуу жайдын 5-курсунда окуп жаткан мезгилде Нарын облустук М.Рыскулов атындагы музыкалуу драма театрына "Жашоо деген…" (дипломдук иши) спектаклин койгон.
2012-жылдан ушул күнгө чейин М. Рыскулов атындагы Нарын облустук академиялык музыкалуу драма театрында көркөм жетекчи, режиссёр-коюучу болуп эмгектенген.
Маркумду узатуу зыйнаты 3-майда саат 11:00дө Нарын шаарында Жаңы-Жол аймагында өтөт.
Kaktus.kg сайты Шамбет Мендебаировдун дүйнө салганына байланыштуу үй-бүлөсүнө жана жакындарына көңүл айтат.
