"Азаттыктын" жабылышы боюнча өкүм чыгарган судья тууралуу эмне белгилүү?
Бүгүн, 27-апрелде Бишкектин Ленин райондук сотунда Кыргызстандын Маданият, маалымат жана жаштар саясаты министрлигинин "Азаттыкка" анын ишин токтотуу боюнча доо арызы боюнча соттук отурум өттү. Судья Чолпон Каримбаева "Азаттыктын" редакциясынын ишмердүүлүгүн токтотуу чечимин чыгарды.
Өкүм чыгарган судья тууралуу эмне белгилүү?
Каримбаева Чолпон Матеминовна 1982-жылы 14-январда туулган. 2021-жылдын апрель айында Сотторду тандоо кеңешинин чечими, ошондой эле 2016-жылы президенттин жарлыгы менен Ош облусунун Өзгөн райондук сотунун судьясы болуп дайындалган.
Сотторду ротациялоонун алкагында президент Каримбаеваны Өзгөн райондук сотунан баш калаанын Ленин райондук сотуна которгон.
2018-жылдын декабрь айында Ош облусунун прокурору Өзгөн райондук сотунун судьясы Чолпон Каримбаеванын судьянын процессуалдык мыйзамдардын нормаларын сактабагандыгы үчүн жасаган иш-аракеттерине карата сунуштама менен тартип комиссиясына кайрылган. Материалдарды изилдеп, сурамжылоо жүргүзүп, комиссия акырында сунушту канааттандыруу жана судьяны эскертүү түрүндө дисциплинардык жоопкерчиликке тартуу чечимин кабыл алган.
Судьянын декларациясы
Ачык булактарда судья Каримбаеванын кирешеси тууралуу декларациясы бар.
2019-жылы ал 474 959 сом киреше таап, 53 чарчы метр батирди көрсөткөн. Анын 158 миң сомго ири жана майда малы бар экендиги жазылган.
Каримбаева 2020-жылы 1 миллион 207 миң 114 сом киреше тапканын билдирген. Анда жалпы малдын баасы 118 миң сомду түзгөнү көрсөтүлгөн.
Каримбаева 2021-жылы 492 128,2 сом киреше тапканын, ошондой эле 262 478 сом короткондугун жазган. Анда мурдагыдай эле батири көрсөтүлгөн. Бирок малдын саны 2021-жылы кескин өскөн: майда малдын жалпы баасы 311 миң сомду түзөт.
