УКМК: Ленин райондук сотунун судьясы пара талап кылууга досторун тарткан
Бишкек шаарынын Ленин райондук сотунун судьясына УКМК тарабынан иш козголду. Коопсуздук комитеттен кабарлашкандай, судьяны кармоого жарандардан түшкөн кайрылуу себеп болгон.
Текшерүүдө судья К.Н.Т. тарабынан каралып жаткан кылмыш иши боюнча оң чечим чыгаруу үчүн ортомчулар аркылуу 2000 доллар опузалап акча талап кылуу фактысы аныкталган. Сот талаптар аткарылбаса айыпталуучуну белгилүү бир мөөнөткө эркиндигинен ажыратууга байланыштуу жаза чыгаруу менен коркуткан.
Бул факты боюнча 343-берененин 2-бөлүгү (Опузалап пара талап кылуу) боюнча кылмыш иши козголуп, тергөө иш-чараларынын негизинде судья тарабынан Ленин райондук сотунун аппарат кызматкерлерин, ошондой эле жакын досторун тартуу менен соттолуучулардан акча каражатын алуу максатында уюштурулган туруктуу коррупциялык схема такталды.
Сот аппаратынын кызматкерлери айыпталуучулардан опузалап алынган сумманы жашыруунун зарыл чараларын сактоо менен алышып, андан кийин алар талап кылынган сумманы судьянын досуна өткөрүп беришкен. Ал эми судья өзүнүн жеке коопсуздугун камсыздагандан кийин гана акчаны алган. Кылмышка тиешеси бар ар бир адамга жалпы суммадан белгилүү бир үлүш берилип турган.
"Кыргыз Республикасынын судьяларынын статусу жөнүндө" мыйзамга ылайык, судьяны жаза жоопкерчилигине тартууга Судьялар кеңешинин макулдугу менен гана жол берилет. Учурда тиешелүү тергөө иш-чаралары жүргүзүлүп, анын жыйынтыгы менен судьяны кылмыш жоопкерчилигине тартууга макулдук алуу процедурасы башталат.
