Туристтик поезд Европадан саякатчыларды Бишкекке алып келди. Алар кантип тосуп алышты?
Бүгүн, 21-апрелде Бишкекке Европадан келген коноктор менен туристтик поезд келди. Бул тууралуу "Кыргыз темир жолу" УК" мамлекеттик ишканасынын басма сөз кызматы билдирди.
Маалыматка ылайык, конокторду Бишкек-2 темир жол станциясынан тосуп алышкан.
"Туристтердин программасы бай – өлкөнүн кооз жерлери менен таанышуу, ошондой эле кыргыз элинин тарыхый жана маданий мурастарынын объектилерине баруу, Кыргызстандын бермети – Ысык-Көлгө саякат", - деп айтылат маалыматта.
Европадан келген 60 турист Кыргызстанда эки күнгө жакын болуп, андан соң Казакстанга барышат, деп билдирди компания.
Маалым болгондой, иш-чара салтка айланып баратат: ушул эле туристтик поезд Кыргызстанга 2022-жылдын сентябрь айында келген.
2022-жылдын август айында "Кыргыз темир жолу" мамлекеттик ишканасына "Lernidee Erlebnis Reisen" туристтик компаниясынын өкүлдөрү Европадан келген коноктор үчүн Кыргызстанга туристтик турга жардам берүү өтүнүчү менен кайрылышкан.
