Казакстан Россияга реэкспорттолуп жаткан товарларды текшерүүнү күчөтөт

Россия Батыштын санкцияларын айланып өтүүгө жардам берүү менен байланышкан тобокелдиктерди азайтуу үчүн Казакстанда келерки айдан тарта өлкөдөн импорттолгон жана экспорттолгон бардык товарларды көзөмөлдөөгө мүмкүндүк берүүчү онлайн система ишке кирет. Бул тууралуу Eurasianet Казакстан Республикасынын чиновниктеринин биринин сөзүнө таянуу менен жазып чыкты.

Басылма белгилегендей, бул "Казакстандын Батыш киргизген чектөөлөргө ылайык экенин көрсөтүүгө болгон макулдашылган аракеттеринин" бири.

"Биздин өкмөт Казакстан Россия менен соодага эч кандай санкцияларды жана чектөөлөрдү киргизбей турганын бир нече жолу жана абдан ачык билдирген. Бирок ал Батыштын санкцияларын айланып өтүүгө жол бербейт жана мындай айланып өтүү үчүн аянтча болуп калбайт. Биз буга байланыштуу бардык тобокелдиктерди түшүнөбүз. Ошондуктан биз бардык өнөктөштөр менен болгон өз ара соодабызды кылдаттык менен көзөмөлдөп жатабыз", - деди атын атагысы келбеген казакстандык аткаминер Eurasianet агенттигине.