Алмазбек Исманкуловдун микрохирургиясы шаардык оорукананын имаратынан чыгарылды. Видео
Алмазбек Исманкуловдун "Көздүн микрохирургиясы" клиникасынын кызматкерлери №6 шаардык оорукананын имаратын бошотушту. Бишкек шаардык мэриясынын басма сөз кызматы билдиргендей, мындай чечим муниципалдык менчик боюнча комиссиянын отурумунда кабыл алынды.
11-мартта Бишкек шаардык мэриясынын кызматкерлери ооруканага барышып, имаратты толугу менен бошотууну суранышкан. Муниципалдык менчикти башкаруу департаментинин кызматкерлери жеринде иш алып барышкан.
Белгилей кетсек, "Көздүн микрохирургиясы" ооруканасынын жетекчиси Алмазбек Исманкулов учурда Бишкек шаарындагы СИЗО-1де жатат. Ага жана Бишкек мэриясынын жооптуу кызматкерлерине "Коррупция" беренеси боюнча кылмыш иши козголгон. Алар "мыйзамсыз түрдө материалдык пайда жана башка жеңилдиктерди алуу максатында кылмыш иштерин жасаган" деп шектелүүдө.
