Салык кодексине өзгөртүү киргизүүнү талкуулоо кайрадан жылдырылды. А. Жапаров келген жок
Жогорку Кеңештин Бюджет, экономикалык жана фискалдык саясат боюнча комитети Салык кодексине өзгөртүүлөрдү киргизүүнү талкуулоону кийинкиге жылдырды.
Комитет төрагасы Данияр Төлөновдун айтымында, 47 депутаттан 199 өзгөртүү сунушу түшкөн. Алардын 82си кабыл алынган, 11и жарым-жартылай, 102 сунуш четке кагылган. Чарба субъектилеринен 59 сунуш түшүп, 20сы макулдашылган, алтоо жарым-жартылай, 32си четке кагылган.
Депутат Камила Талиева жыйынга премьер-министр Акылбек Жапаров менен экономика жана коммерция министри Данияр Амангелдиев катышпаганын белгиледи. Ал талкууну документ толугу менен даяр болгонго чейин марттын аягына жылдырууну сунуштады. Анын демилгесин Надира Нарматова менен Акылбек Түмөнбаев колдоду.
Бирок, президенттин жана министрлер кабинетинин өкүлү Алмасбек Абытов жыйынга өзгөртүүлөрдү иштеп чыгууга жана бекитүүгө түздөн-түз министрлер кабинетинин жетекчисинин биринчи орун басары Адылбек Касымалиев катышат деп жооп берди. Ошондуктан, анын айтымында, Жапаровдун болушунун зарылчылыгы жок.
Талкуунун жыйынтыгында комитет мүчөлөрү мыйзам долбоорун талкуулоону кийинкиге калтыруу чечимине келишти.
