Түркиядан 28 кыргызстандык өлкөгө кайтышты
Түркиядан 2 күн ичинде 28 кыргызстандык өлкөгө эвакуацияланды. Аларды Ак-Жол чек ара постунан ӨКМнын кызматкерлери тосуп алышты.
Аталган министрликтин маалыматы боюнча, 10-февралда саат 08:40 чамасында Түркиядан Казакстан аркылуу келген 20 жаранды Ак-Жол чек ара постунан ӨКМнын кызматкерлери тосуп алышты.
Алар алгач Түркиядан Астана шаарына учуп келишкен. Ал жактан Кыргызстандын Тышкы иштер министрлигинин өкүлдөрү тосуп алышып, транспорт менен Кыргызстандын чек арасына узатып келишкен.
Ал эми наристелүү эне Алма-Ата шаарына учак менен жөнөтүлүп, андан ары автотранспорт менен Кыргызстанга жеткирилди.
Ошондой эле 9-февралда Кыргыз Республикасынын 6 жараны Түркиядан Өзбекстандын Ташкент шаарына учуп, андан ары КР ТИМдин өкүлдөрүнүн коштоосунда 10-февралда саат 20:10 чамасында Ак-Жол чек ара постуна жеткирилди. Ал жерден ӨКМнын кызматкерлери тосуп алып, үйлөрүнө узатышты.
